முதல் ரயில் பயணம்

1
630
6730f39880f4e11b061dcbe36c278ca3

 

 

 

 

இதுவரை காலமும்
புகைப்பட அட்டைகளிலும்
தொலைக்காட்சிப் பெட்டிகளிலும்
பார்த்துப் பழகிப்போன
ஓர் உருவம்

அடர்ந்த காட்டின்
கூந்தலின் உள்ளிருந்து
ஒலியெழுப்பிய வண்ணம்
எனதருகில் தரித்து நின்றாள்

சிறுகுழந்தையின் முன்னிலையில்
கரைந்து வடியும் ஐஸ்குச்சியை
சுவை பார்க்கத் துடித்திடும்
மனம் கொண்டிருந்தேன்

அவளிலேறும் வரை…

முதல் தடவை என்பதால்
ஆனந்த பெருக்கில்
நீந்திக் கொண்டிருந்த எனக்கு
மறுமுனையில் நடுக்கமும், நாவறட்சியும்

ஹிக்கடுவையிலிருந்து கொழும்பு
நோக்கிய பயணமது
என்றாலும் உலகம் சுற்றப்
போகிறேன் என்றவொரு அவா!

எனதிருக்கையில் அமர்ந்த படி
எல்லாவற்றையும் ரசித்துக் கொண்டிருந்தேன்…

இரும்புப் பட்டிகளில்
சக்கரங்களின் உரசல்களாயிருக்கட்டும்

வளையும் பெட்டிகளின்
இடை நெளிவாயிருக்கட்டும்

புகையினை உமிழும்
கருநிற உதடுகளாயிருக்கட்டும்

குகையினில் மறையும்
ஒட்டுமொத்த உடலாயிருக்கட்டும்

அனைத்திலும்
திளைத்திருந்தேன்…

நண்பர்கள் கதவடியில் நின்றுகொண்டு
பாடல்கள் இசைத்தும்
கைதட்டி ரசித்தும்
புகைப்படம் எடுத்துக் கொண்டார்கள்

இருக்கையை விட்டு
எழுந்து சென்று பார்த்த எனக்கு
பங்குகொள்ள முடியாமல் போனது
பாவி இவள் குலுக்களினால்

கொழும்பில் இறங்கி
மட்டக்களப்பிற்குச் செல்ல
பயணச்சீட்டு வாங்கி
பத்திரப்படுத்திக் கொண்டேன்

ஊர் திரும்புதலை நினைத்து
பேரின்பம் கொள்ள மறுத்த மனது
இவளுக்காய் ஏங்கி
அவள் மடியில் தூங்கிக் கொண்டிருந்தது

குளிர் காற்றின் தழுவலில்
மழைத்துளிகள் முத்தமிட்டு
என்னை எழுப்பிவிட்டு
மூஞ்சு காட்டிச் சென்றன

அப்படி என்ன கோவமோ
என்னில்?

பத்திரமாக இறக்கிவிட்டு
பிரியாவிடை ஒலியெழுப்பி
ஆகாசவெளியில் எங்கோ பறந்து
மறைந்து சென்றுவிட்டாள்…

 

 

 

 

3 1 வாக்களியுங்கள்
இதை மதிப்பிடுங்கள்
இங்கே பதிவு செய்க
என் கருத்துக்கு
1 கருத்து
பழமையான
புதியது அதிகம் வாக்களித்தனர்
இன்லைன் பின்னூட்டங்கள்
எல்லா கருத்துகளையும் காண்க
Mohamed Faisal
Mohamed Faisal
3 years ago
இதை மதிப்பிடுங்கள் :
     

super